ថ្ងៃទី 12 ខែកក្កដា ឆ្នាំ2012, ម៉ោង 10:58 AM ប្រែសម្រួល : វណ្ណារី ទេពប្រណម្យ
+ លក្ខណៈទូទៅ៖
ការរលូតកូន (Abortion) សំដៅដល់ការបញ្ចប់ ការមានគភ៌ មុនពេលកំណត់ដែលទារក ត្រូវសម្រាល ហើយអាចចិញ្ចឹមឱ្យរស់រានមានជីវិតបាន។ នៅតាម ប្រទេសនីមួយៗ មានក្រឹត្យក្រមការវិនិច្ឆ័យសភាពរលូតកូន មិនដូចគ្នា តែក្រិត្យក្រមវិនិច្ឆ័យជាទូទៅ គឺ ៖
-ទារកកើតមុនអាយុគភ៌ ២៨សប្តាហ៍។
-ទារកមានទម្ងន់ខ្លួនពេលកើត តិចជាង ១.០០០ក្រាម។
-ទារកមានប្រវែងដងខ្លួនពេលសម្រាល តិចជាង ៣៥ស.ម។
ស្ត្រីមានផ្ទៃពោះដែលមានបញ្ហារលូតកូន ភាគច្រើន បានមករកគ្រូពេទ្យ ដោយអាការធ្លាក់ឈាមតាមទ្វារមាស និងឈឺក្នុងពោះ ដោយអ្នកខ្លះអាចមិនបានដឹងថា ខ្លួនមាន ផ្ទៃពោះជាមុនផងក៏មាន ខណៈស្ត្រីប្រមាណ ១០-២៥% មានផ្ទៃពោះ និងមានការរលូតកូន ដោយមិនដឹងខ្លួន។
+ ការរលូតកូន បែងចែកជា ៧ក្រុម គឺ៖
១. ការរលូតដោយមានសញ្ញាគំរាម (Threaten Abortion)៖ ជាសភាពដែលមានធ្លាក់ឈាមតាមទ្វារមាស ប៉ុន្តែ មាត់ស្បូននៅមិនទាន់បើក ហើយទារកក្នុងផ្ទៃ ក៏នៅមាន ជីវិតនៅឡើយ ធ្វើឱ្យអាចរក្សាគភ៌ ឱ្យនៅគង់វង្ស រហូតដល់ គ្រប់កំណត់សម្រាលបាន។ ប៉ុន្តែ ក៏មានស្ត្រីមួយចំនួន អាច មានការរលូត មិនអាចចៀសវាងបានតាមក្រោយទៀត។
២. ការរលូតដោយមិនអាចចៀសវាងបាន (Inevitable Abortion)៖ ជាសភាពដែលស្ត្រីមានផ្ទៃពោះ ធ្លាក់ឈាម តាមទ្វារមាស ប៉ុន្តែ មិនទាន់មានទារក ឬបំណែកគភ៌ ចេញមកខាងក្រៅនៅឡើយ។ នៅពេលគ្រូពេទ្យពិនិត្យ ខាងក្នុង រកឃើញថា មានការបើកមាត់ស្បូន ហើយអ្នកខ្លះអាចមានបែកថង់ទឹកភ្លោះ រួមជាមួយផង ធ្វើឱ្យទារក មិនអាចរស់រានមានជីវិតបន្តទៀត នៅក្នុងផ្ទៃស្បូនបាន បណ្តាលឱ្យមានការរលូតចេញមកក្រៅ យ៉ាងពិតប្រាកដ។
៣. ការរលូតមិនពេញលេញ (Incomplete Abortion)៖ ស្ត្រីមានផ្ទៃពោះ នឹងមករកគ្រូពេទ្យ ដោយអាការធ្លាក់ឈាមតាមទ្វារមាស និងឈឺពោះខ្លាំង ព្រមទាំងប្រាប់ថា មានទារក ឬបំណែកសុក ធ្លាក់ចេញ មកក្រៅហើយ។ នៅពេលគ្រូពេទ្យពិនិត្យខាងក្នុង ឃើញថា មាត់ស្បូនបើក និងមានធ្លាក់ឈាមតាមមាត់ស្បូន ជារឿយៗ បង្ហាញឱ្យឃើញថា នៅមានបំណែកទារក ឬបំណែកសុកខ្លះ នៅសេសសល់ក្នុងស្បូន នៅឡើយ ចាំបាច់ត្រូវព្យាបាល ដោយការកោសស្បូន ដើម្បីយកបំណែកនៅសល់ ចេញមកឱ្យអស់។
៤. ការរលូតពេញលេញ (Incomplete Abortion)៖ ស្ត្រីមានផ្ទៃពោះ នឹងមកជួបគ្រូពេទ្យ ដោយអាការធ្លាក់ឈាម តាមទ្វារមាស និងមានទារក ឬបំណែកទារកធ្លាក់ចេញ មកក្រៅរួចហើយ បន្ទាប់មក ឈាមក៏ឈប់ហូរ។ ពេល ពិនិត្យខាងក្នុង គ្រូពេទ្យនឹងរកឃើញថា មាត់ស្បូន បានបិទវិញហើយ ចាត់ទុកជាការរលូតពេញលេញហើយ មិន- ចាំបាច់ត្រូវផ្តល់ការព្យាបាលអ្វីបន្ថែមទៀតទេ។
៥. ការរលូតជាអចិន្ត្រៃយ៍ (Habitual Abortion)៖ សំដៅដល់ស្ត្រីមានផ្ទៃពោះ ដែលមានការរលូតកូនជាប់ៗគ្នា តាំងពី៣ដងឡើងទៅ ចាំបាច់ត្រូវបានទទួលការពិនិត្យបន្ថែម ដើម្បីរកមូលហេតុនៃការរលូតកូន ដូចជា ភាពខុសប្រក្រតី នៃក្រូម៉ូសូម ឬភាពខុសប្រក្រតីនៃរចនាសម្ព័ន្ធបន្តពូជ ភេទស្ត្រី ដើម្បីបានទទួលការព្យាបាលដ៏សមស្រប និង បង្ការការរលូតកូន នៅពេលមានផ្ទៃពោះលើកក្រោយៗទៀត។
៦. ការបញ្ចប់គភ៌ ដើម្បីជួយជីវិតម្តាយ (Therpevtic Abortion)៖ ជាការបញ្ចប់គភ៌ ដោយគ្រូពេទ្យ អាចធ្វើបាន តាមការកំណត់របស់ច្បាប់ គឺគភ៌ អាចមានគ្រោះថ្នាក់ចំពោះ សុខភាពរបស់ម្តាយ (ដូចជា ម្តាយឈឺជំងឺបេះដូងធ្ងន់ធ្ងរ បើមានគភ៌បន្តទៀត អាចមានគ្រោះថ្នាក់ដល់ជីវិត) ឬគភ៌ ដែលកើតឡើងដោយសារការចាប់រំលោភ។
៧. ការរំលូតកូនខុសច្បាប់(Criminal Abortion)៖ ជាការរំលូតកូន ដោយគ្រូពេទ្យ ឬមនុស្សទូទៅ ដោយពុំមានការកំណត់តាមច្បាប់។ ក្រោយពីរំលូតហើយ តែងតែ កើតមានសភាពជ្រៀតជ្រែកច្រើន ដូចជា ឆ្លងមេរោគ ធ្លាក់ឈាម ធ្លុះស្បូន ជាដើម ដែលអ្នកខ្លះអាចធ្ងន់ធ្ងរ រហូតដល់ថ្នាក់បាត់បង់ជីវិតបាន។
+ អាការនៃការរំលូតកូន៖
បើស្ត្រីមានផ្ទៃពោះ មានអាការដូចខាងក្រោម គួរប្រញាប់ទៅជួបគ្រូពេទ្យ ដើម្បីពិនិត្យមើលថា មានការរំលូតកូនកើតឡើងឬទេ ?
-មានធ្លាក់ឈាមស្រស់ៗ ឬសំបោរលាយឈាម ហូរ ចេញតាមទ្វារមាស។
-ឈឺចាប់ ឬឈឺធ្ងន់ៗនៅក្នុងពោះក្រោមផ្ចិត។
-បាត់អាការរបស់អ្នកមានផ្ទៃពោះ។
+ មូលហេតុ៖
ការរំលូតកូន មានច្រើនមូលហេតុ បែងចែកជា ២ ក្រុមធំៗ គឺ៖
១. មូលហេតុពីទារកក្នុងផ្ទៃ៖ តែងតែបញ្ចប់គភ៌ តាំងពីអាយុគភ៌ ៣ខែដំបូង ដូចជា ៖
-មានភាពខុសប្រក្រតីរបស់ក្រូម៉ូសូម អាចកើត មានភាពខុសប្រក្រតីនៅអូវុល ឬនៅមេរូបជីវិត ឬនៅក្នុង អំឡុងពេលដែលអំប៊្រីយ៉ុង កំពុងផ្តាច់ខ្លួន បង្កើនចំនួនកោសិកា។ ជាមូលហេតុនៃការរលូតកូន ដែលជួបញឹកញាប់បំផុត។
-មានការលូតលាស់របស់អំប៊្រីយ៉ុង ក្នុងផ្ទៃ ក្រោយ ពីបដិសន្ធិខុសប្រក្រតី ដូចជា ផ្ទៃពោះខ្យល់ (Blighted Ovum) មានតែថង់ផ្ទៃពោះ ប៉ុន្តែ អំប៊្រីយ៉ុង បានរួញស្វិត បាត់ទៅហើយ)។
២. មូលហេតុពីម្តាយ៖ តែងតែកើតមានការរលូតកូន ក្នុងអំឡុងពេលអាយុគភ៌ លើសពី៣ខែហើយ ដូចជា ៖
-ម្តាយឈឺរ៉ាំរ៉ៃ ធ្វើឱ្យសុខភាពមិនរឹងមាំ។
-មានការឆ្លងមេរោគធ្ងន់ធ្ងរ ក្នុងពេលមានគភ៌ ធ្វើឱ្យម្តាយមានគ្រុនក្តៅខ្ពស់ ដូចជា ឆ្លងមេរោគគ្រុនចាញ់ ឬ រលាកតម្រងនោម។ -ម្តាយបានទទួលសារធាតុអាហារមិនគ្រប់គ្រាន់។
-ម្តាយទទួលទានថ្នាំមួយចំនួន ដែលមានផលប៉ះពាល់ដល់ទារកក្នុងផ្ទៃ។
-ម្តាយមានការដំណើរជីវិតមិនសមស្រប ដូចជា ជក់បារី ពិសាគ្រឿងស្រវឹង ឬកាហ្វេ ច្រើនជាង៤កែវ ក្នុង១ថ្ងៃ ការទទួលរងវិទ្យុសកម្ម ឬសារធាតុគីមី ជាដើម។ -ម្តាយមានបញ្ហាមាត់ស្បូនមិនរឹងមាំ។
-ម្តាយបានទទួលគ្រោះថ្នាក់ក្នុងពេលមានផ្ទៃពោះ។
+ ការវិនិច្ឆ័យជំងឺ៖
-ប្រវត្តិជំងឺ៖ អ្នកជំងឺ មកជួបគ្រូពេទ្យ ដោយអាការ ដូចពោលខាងលើ។
-ការពិនិត្យរាងកាយ៖ មានការពិនិត្យសំខាន់គឺ៖
+មើលសញ្ញាជីវិត៖ មើលថា សម្ពាធឈាមល្អឬទេ? មានគ្រុនក្តៅឬទេ ? (បើមានគ្រុនក្តៅ អាចធ្វើឱ្យសង្ស័យ លើការឆ្លងមេរោគនៅក្នុងផ្ទៃស្បូន ដែលតែងតែកើតឡើង បន្ទាប់ពីការរំលូតកូនខុសច្បាប់ ព្រោះខ្វះអនាម័យ)។
+ការពិនិត្យពោះ៖ មើលទំហំរបស់ស្បូន ដើម្បីប៉ាន់ប្រមាណអាយុគភ៌ និងមើលថា មានអាការឈឺពោះខ្លាំង ឬទេ ? និងមានអាការបង្ហាញដែលបញ្ជាក់ថា ត្រូវមានការវះកាត់ ជាបន្ទាន់ឬទេ ?
+ការពិនិត្យខាងក្នុង៖ មើលថា មានចេញឈាម តាមមាត់ស្បូនឬទេ ? មានបំណែកគភ៌ នៅក្នុងទ្វារមាស ឬជាប់នៅនឹងមាត់ស្បូន ឬទេ ? ពិនិត្យទំហំស្បូន ដើម្បី ប៉ាន់ប្រមាណអាយុគភ៌, ពេលសង្កត់ពោះ មានការឈឺស្បូន ឬទេ ? ដែលបញ្ជាក់ថា មានការរលាក ឬឆ្លងមេរោគ នៅស្បូន។
+ការពិនិត្យបន្ថែមនៅបន្ទប់ពិសោធន៍ ៖
ស្ត្រីមានផ្ទៃពោះ ដែលសង្ស័យថា មានការរលូតកូន តែងតែបានទទួលការពិនិត្យបន្ថែម តាមរយៈការឆ្លុះអេកូពោះ ឬពិនិត្យតាម- ទ្វារមាស ដើម្បីធ្វើការវាយតម្លៃថា នៅមានទារកនៅក្នុងផ្ទៃឬទេ ? បើរលូតចេញមកក្រៅហើយ តើបំណែកគភ៌ ចេញ មកខាងក្រៅអស់ឬនៅ ? ចាំបាច់ត្រូវបានទទួលការព្យាបាល ដោយការកោសស្បូន ទៀតឬទេ ?
+ សភាពគ្រោះថ្នាក់៖
ការរលូតកូន អាចធ្វើឱ្យមានគ្រោះថ្នាក់ផ្សេងៗ ដូចជា ៖
១. ការរលូតកូនដោយឯកឯង អាចបណ្តាលឱ្យ៖
-មានសភាពធ្លាក់ឈាមច្រើន រហូតដល់អ្នកជំងឺ មានសម្ពាធឈាមទាប ឬស្លេកស្លាំង។
-បើមានបំណែកគភ៌សេសសល់នៅក្នុងផ្ទៃស្បូន អាច ធ្វើឱ្យកើតមានការឆ្លងមេរោគក្នុងស្បូនបាន។
-ធ្វើឱ្យម្តាយ មានសភាពក្រៀមក្រំចិត្ត ពីការរលូតកូន ញឹកញាប់ មិនអាចមានកូនបានតាមសេចក្តីប្រាថ្នារបស់ខ្លួន។
២. ការរំលូតកូនខុសច្បាប់៖ ភាគច្រើនតែងតែធ្វើដោយបុគ្គលទូទៅ ដែលមិនមែនជាគ្រូពេទ្យ ធ្វើឱ្យការរំលូត មិនត្រឹមតែ មិនត្រូវតាមវិធីទេ តែបណ្តាលឱ្យមានសភាព គ្រោះថ្នាក់ផ្សេងៗជាញឹកញាប់ គឺ៖
-ធ្លាក់ឈាមច្រើន៖ ក្នុងករណីរំលូតហើយ ប៉ុន្តែ យកចេញមិនអស់។
-ធ្លុះស្បូន៖ ដោយសារការរំលូត មានការបញ្ចូល ឧបករណ៍ដែក ឬវត្ថុចម្លែក ទៅក្នុងស្បូន ដាក់មិនត្រូវទិស ឬដាក់ជ្រៅពេក អាចធ្វើឱ្យធ្លុះស្បូន បានដោយងាយ។ -ឆ្លងមេរោគក្នុងស្បូន៖ ឧបករណ៍ដែក ឬវត្ថុចម្លែក ដែលដាក់បញ្ចូលទៅក្នុងស្បូន ដែលប្រើក្នុងការរំលូត នោះ ភាគច្រើនពុំមានអនាម័យគ្រប់គ្រាន់ តាមកម្រិត- មាត្រដ្ឋាន បណ្តាលឱ្យអ្នកជំងឺ កើតមានការឆ្លងមេរោគ បានយ៉ាងងាយ ទាំងមេរោគបាក់តេរី និងមេរោគតេតាណូស។
+ ការព្យាបាល៖
ការព្យាបាលករណីរលូតកូន អាស្រ័យទៅលើប្រភេទ នៃការរលូតកូន គឺ៖
១. ការរលូត ដោយមានសញ្ញាគំរាម៖
បើពិនិត្យ អេកូហើយ រកឃើញថា៖
-ទារកក្នុងផ្ទៃមានជីវិត ៖ គ្រូពេទ្យ នឹងណែនាំឱ្យស្ត្រីមានផ្ទៃពោះ ត្រឡប់ទៅគេងសម្រាកឱ្យបានច្រើន មិនធ្វើការ ធ្ងន់ និងផ្អាកការរួមភេទ។ ស្ត្រីមានផ្ទៃពោះ មួយចំនួន មិនចាំបាច់ទទួលទានថ្នាំព្យាបាលអ្វី នឹងសះស្បើយទៅវិញ ដោយឯកឯង និងអាចមានផ្ទៃពោះ ជាបន្តទៀត រហូតដល់ គ្រប់កំណត់សម្រាលបាន ខណៈដែលស្ត្រីមានគភ៌មួយចំនួន នឹងកើតមានការរលូត មិនអាចចៀសវាងបានតាមក្រោយ ទោះបីជាខំថែទាំខ្លួនបានល្អយ៉ាងណាក្តី។
-ទារកក្នុងផ្ទៃ បេះដូងលែងដើរ៖ គ្រូពេទ្យ នឹងយក បំណែកគភ៌ ចេញពីផ្ទៃស្បូន ដោយការកោសស្បូន ឬដាក់ថ្នាំសុលតាមទ្វារមាស ជំរុញឱ្យមានការបើកមាត់ស្បូន និងមានការកន្ត្រាក់ខ្លួនរបស់ស្បូន ដើម្បីបញ្ចេញបំណែកគភ៌ មកក្រៅ។
២. ការរលូតដោយមិនអាចចៀសវាងបាន និងការរលូត មិនពេញលេញ៖
មិនអាចរក្សាគភ៌ឱ្យនៅគង់វង្សបានទេ និង មានការប្រឈមនឹងការធ្លាក់ឈាមច្រើនទៀតផង។ ដូច្នេះ ត្រូវយកបំណែកគភ៌ចេញពីស្បូន ឱ្យអស់ ដោយការប្រើតង្កៀប ជួយកៀបយកចេញពីស្បូន ឬប្រើឧបករណ៍ ចូលទៅកោសក្នុងផ្ទៃស្បូន។
៣. ការរលូតពេញលេញ៖
ត្រូវពិនិត្យបំណែកគភ៌ ថា ចេញមកអស់ឬនៅ? ឬអះអាងដោយការឆ្លុះអេកូ ថា ពុំមានបំណែកគភ៌ សេសសល់ក្នុងស្បូន។ ការព្យាបាល ធ្វើឡើងដោយការសង្កេតអាការឈឺពោះ និងការធ្លាក់ឈាម ខុសប្រក្រតី តាមទ្វារមាស ជាមុន បើមានធ្លាក់ឈាម បញ្ជាក់ថា នៅមានបំណែកគភ៌ សេសសល់ក្នុងស្បូន ចាំបាច់ ត្រូវទទួលការព្យាបាល ដូចការរលូតកូនមិនពេញលេញដែរ៕
0 comments